mohabbaton ko kahin aur pal kar dekho
mata-e-jaan ko badan se nikal kar dekho

badal ke dekho kabhi nisbaton ki duniya ko
badan ko ruh ke khane mein dal kar dekho

suno use to samaat se mawara ho kar
jo dekhna ho to aankhen nikal kar dekho

yaqin dasht se phutega aab-e-ju ki tarah
ki harf-e-la ki gawahi bahaal kar dekho

nafas nafas hai yahan maqbara aqidat ka
ye maqbaron ka jahan paemal kar dekho

isi hawa mein mohabbat ka dip jalta hai
isi jahan ko jahan-e-visal kar dekho

wo sang de to hararat nichod lo apni
jo phul de to nigah-e-kamal kar dekho

phir us ke baad koi dar nahin talatum ka
us ek bund ke gham ko wishaal kar dekho

badan ki pyas bhi ek mawara kahani hai
har ek bund ko dariya khayal kar dekho

palat ke aaenge sawan ke rang aaankhon mein
tum apne-ap se rishta bahaal kar dekho

wo bolta hai pahadon ki ot se aksar
kisi pahad se us ka sawal kar dekho

ye raaz aur kahan tak hamein nibhana hai
kabhi to raat mein suraj nikal kar dekho

tum apne gauhar-e-yakta ko is tarah dhundo
ki khud ko be-sar-o-saman khayal kar dekho

jo dekhna ho kabhi doston ka dil 'ahmad'
khare usul ka patta uchhaal kar dekho