mubarak dosto tum ko tumhaari bazm-arai
khuda-hafiz main ab chalta hun su-e-dasht-e-tanhai

rawish badli na gul mahke na naghme hain na shahnai
bada shohra tha gulshan mein bahaar aai bahaar aai

khusha eajaz ulfat dafatan ye kaisi yaad aai
sar-e-tur-e-takhayyul jaise mauj-e-barq lahrai

na hargiz shikwa-e-beganagi karta zamane se
jo hota aashna-e-lazzat-e-zakhm-e-shanasai

koi sar-gashta-e-rasm-e-junun hai nara-zan 'athar'
sar-e-shahr-e-khamoshan kaisi aawaz-e-azan aai