mubarak ho ye tarz-e-be-rukhi ye hausla tujh ko
mujhe tu bhul jae itni khushiyan de khuda tujh ko

hazaron aks lahraate hain sath-e-ab-dida par
kise nabud kar dena hai tufan-e-bala tujh ko

kahin khuddariyan tanhaiyon se jhenp jati hain
mere kuchh sher padh lena maza aa jaega tujh ko

waqar-e-shakhsiyat mein farq to padta nahin lekin
asar-andaz hota hai hamara dekhna tujh ko

ye kya andaz hai 'ashhar' sharifon se takhatub ka
sharaf bakhsha na jaega kisi taqrib ka tujh ko