muft kab aazad karti hai giraftari mujhe
ji hai aakhir le ke chhodegi ye bimari mujhe

kab hawas hai mujh ko ruswai ki lekin kya karun
khinch kar lati hai is kuche mein lachaari mujhe

main jo bin gham-khwar hargiz ji na sakta tha kabhu
in dinon karni padi hai dil ki gham-khwari mujhe

ishq ke fan se abhi mujh ko kahan hai ittilaa
kuchh nahin aata baghair az nala-o-zari mujhe

kya laga leta hai khuban ko 'yaqin' karti hai dagh
aaine ki sada-lauhi sath purkari mujhe