mujh mein basne wale shakhs ne mujh mein rahna chhod diya
us ne meri baat na mani main ne kahna chhod diya

tum jaise marzi socho par log to sab kuchh jaante hain
kis ne kitna sath nibhaya kis ne kitna chhod diya

is tariki mein ab aur kisi par kya ilzam dharun
mujh ko jab mere apne sae ne tanha chhod diya

duniya bhar ka mere aage gham maujud tha phir main ne
achchha achchha dil mein rakkha aisa waisa chhod diya

pani dene wala jab kuchh roz mein us ko bhul gaya
aakhir ek din paude ne gamle mein rahna chhod diya