mujh pe rakhte hain hashr mein ilzam
aa na jae zaban pe tera nam

zabt ki koshishen bhi jari hain
dard bhi kar raha hai apna kaam

jo ibarat na ho tere gham se
ahl-e-dil par wo zindagi hai haram

waqfa-e-maut bhi ghanimat hai
kuchh to fil-jumla mil gaya aaram

us ne dekha hai sham ka manzar
jis ne dekhi hai bekason ki sham

kis se ab dard ki dawa chahun
dard uthta hai le ke tera nam

ab qayamat qarib hai 'fani'
fitna-e-ishq ho chala hai tamam