mujhe ek ek baras ek ek ghadi ma'lum hoti hai
shab-e-furqat qayamat se badi ma'lum hoti hai

jhadi ashkon ki moti ki ladi ma'lum hoti hai
nihan aankhon mein hire ki kani ma'lum hoti hai

nasihat aaj-kal aisi buri ma'lum hoti hai
bajae dosti ke dushmani ma'lum hoti hai

jawani par wo aae hain sitam karne to do un ko
haqiqat ishq-bazi ki abhi ma'lum hoti hai

bharosa us but-e-ayyar ke wade pe hai tum ko
janab-e-dil mujhe to ye tadi ma'lum hoti hai

sudharna ab bahut dushwar hai haalat-e-alam ka
qayamat tak yahi ab gad-badi ma'lum hoti hai

jo dekha jae to pure na utrenge kisi mad mein
musalmanon mein koi ek kami ma'lum hoti hai

jo munh se kah diya apne use pura hi kar dije
isi se to zaban ki pukhtagi ma'lum hoti hai

yaqin aata nahin un ko 'ata' meri mohabbat ka
mere dil ki lagi bhi dil-lagi ma'lum hoti hai