mujhe mushkil hai tujhe pas bulana jaana
tu agar chahe to aasan hai aana jaana

mil na mil mujh se magar ta-ba-mulaqat kabhu
dil se is bande ko hargiz na bhulana jaana

phira bahutera bhatakta hua main aakhir-kar
tere kuche ke tain apna thikana jaana

jo phira tujh se to be-shubh khuda se hai phira
tere bais se mujhe sara zamana jaana

ek mulaqat hai ruhani digar jismani
kisi surat se wo surat ko dikhana jaana

mahfil-e-yar mein 'khamosh' hai lazim tujh ko
misl-e-parwana par-o-baal jalana jaana