mujhe rahin-e-gham-o-hijr-o-yas rahne do
tamam tohfe mere dil ke pas rahne do

na mere dil se hatao rida-e-jaanan ko
ki mere dil ko zara ba-libas rahne do

farogh-e-dard-e-mohabbat ke waste hamdam
mere raqib ko mere hi pas rahne do

agarche hijr hi chaho qubul hai lekin
tum apne lahje mein thodi mithas rahne do

tum apne husn ka sarmaya chhin lo mujh se
mataa-e-ishq-o-wafa mere pas rahne do

likhen hain jis pe fasane kitab tum rakh lo
wafa-shiar qalam mere pas rahne do