tumhaare bin guzara ho raha hai
khasare par khasara ho raha hai

bahut socha bacha lun khud ko lekin
udhar se phir ishaara ho raha hai

shujaat to shahadat mangti hai
par ab is se kinara ho raha hai

mujhe phir ishq ne aawaz di hai
mujhe to ye dobara ho raha hai

adu ke sath us ko dekhta hun
qayamat ka nazara ho raha hai

zara si tu ne kya ulfat dikhai
tera har gham gawara ho raha hai

makin tum jab se is dil mein hui ho
har ek shai se kinara ho raha hai

ye tera lams tha jis ki wajah se
ye mera dil sharara ho raha hai

tujhe aawaz de kar thak chuka hun
isi khatir gharara ho raha hai