mujhe to yun bhi isi rah se guzarna tha
dil-e-tabah ka kuchh to ilaj karna tha

meri nawa se teri nind bhi sulag uthti
zara sa is mein shararon ka rang bharna tha

sulagti ret pe yaadon ke naqsh kyun chhode
tujhe bhi gahre samundar mein jab utarna tha

mila na mujh ko kisi se khiraj ashkon mein
hawa ke hathon mujhe aur kuchh bikharna tha

usi pe dagh hazimat ke lag gae dekho
yaqin ki aag se jis shakl ko nikharna tha

main khandaron mein use dhundta phira 'fikri'
magar kahan tha wo aaseb jis se darna tha