mujh ko mara hai har ek dard o dawa se pahle
di saza ishq ne har jurm-o-khata se pahle

aatish-e-ishq bhadakti hai hawa se pahle
hont julte hain mohabbat mein dua se pahle

fitne barpa hue har ghuncha-e-sar-basta se
khul gaya raaz-e-chaman chaak-e-qaba se pahle

chaal hai baada-e-hasti ka chhalakta hua jam
hum kahan the tere naqsh-e-kaf-e-pa se pahle

ab kami kya hai tere be-sar-o-samanon ko
kuchh na tha teri qasam tark-e-wafa se pahle

ishq-e-bebak ko dawe the bahut khalwat mein
kho diya sara bharam sharm-o-haya se pahle

khud-bakhud chaak hue pairahan-e-lala-o-gul
chal gai kaun hawa baad-e-saba se pahle

ham-safar rah-e-adam mein na ho taron-bhari raat
hum pahunch jaenge is aabla-pa se pahle

parda-e-sharm mein sad-barq-e-tabassum ke nisar
hosh jate rahe nairang-e-haya se pahle

maut ke nam se darte the hum ai shauq-e-hayat
tu ne to mar hi dala tha qaza se pahle

be-takalluf bhi tera husn-e-khud-ara tha kabhi
ek ada aur bhi thi husn-e-ada se pahle

ghaflaten hasti-e-fani ki bata dengi tujhe
jo mera haal tha ehsas-e-fana se pahle

hum unhen pa ke 'firaq' aur bhi kuchh khoe gae
ye takalluf to na the ahd-e-wafa se pahle