mund kar bas aankh apni un manazir ke khilaf
kar rahe hain hum baghawat daur-e-hazir ke khilaf

tujh talak aawaz meri jate jate kho gai
raste sab ho gae hain is musafir ke khilaf

hausla jo hai to lalkaro khuda ko bhi kabhi
kya milega tum ko ho kar hum se kafir ke khilaf

ek adna dil ke hathon donon hain majbur hum
aao thamen hath hum us shai-e-shatir ke khilaf

ek taraf tha main nihattha ek taraf wo gul-badan
ishq ki bazi main haara ek mahir ke khilaf

ek ek kar ke sabhi purze usi ke ho gae
ab badan mein hun main tanha husn-e-jabir ke khilaf

'ashna' phir khwab mein aaya nahin tu raat bhar
tu bhi shayad ho gaya hai ek shair ke khilaf