mushkilen lakh hon lekin meri khwahish hogi
aap ka sath nibhane ki to koshish hogi

tohmaten kitni lagaoge mohabbat pe meri
is se to shahr mein nafrat ki numaish hogi

in andheron se koi khauf nahin hai mujh ko
main samajhti hun yahan nur ki barish hogi

koi munsif kisi mujrim ko saza kaise de
jab adalat mein wakilon ki sifarish hogi

ab to mazlum bhi khanjar ka sahaara lega
na koi winti karega na guzarish hogi