jo tu zindagi mein na mil saka mujhe is ka koi gila nahin
hai gila nasib mein phir kabhi bhi wafa ka phul khila nahin

main rahungi sang sada tere tu jahan rahe mere ham-safar
mera aashiyan tere dil mein hai meri chah koi qila nahin

meri hasraten mere sath hi tujhe yaad kar ke hain thak gain
teri khamushi hai saza mujhe mere pyar ka ye sila nahin

ye jo khwab hai meri aankh mein tere dam se hai ye bana hua
tera aks aankh ki jhil mein kai muddaton se hila nahin

mera pyar tum to nasib ho meri zindagani ka nur ho
main jahan bhar mein talash ki mujhe tum sa koi mila nahin