mustaqbil ki sab dil-khush-kun baaten khwabon tak mahdud
uns mohabbat mehr-o-wafa gar hain to kitabon tak mahdud

sher-o-adab ko sarhad-warhad se kya lena dena hai
sher-o-adab ki duniya kyon hai aaj nisabon tak mahdud

karobar-e-darogh sharifon ke aiwanon tak pahuncha
sach ki daulat ho kar rah gai khana-kharabon tak mahdud

istighna se aab aati hai khuddari ke chehre par
jhuti ana ki haisiyyat kya sirf hisabon tak mahdud

'mir'-o-'ghaalib' ka sarmaya aahen aansu khun-e-jigar
dhan daulat shahon ka hissa aish nawabon tak mahdud

apne haal hi gum dil wale apni khaal mein mast 'naqib'
is nashshe ko wo kya jaanen jo hain sharabon tak mahdud