na ab wo khush-nazari hai na khush-khisali hai
ye kya hua mujhe ye waza kyun bana li hai

ye haal hai mere diwar-o-dar ki wahshat ka
ki mere hote hue bhi makan khali hai

dam-e-nazara meri hairaton pe ghaur na kar
ki meri aankh azal yunhi sawali hai

mere wajud ko jis ne jala ke rakh kiya
wo aag ab tere daman tak aane wali hai

guzarti shab ka har ek lamha kah gaya mujh se
sahar ke baad bhi ek raat aane wali hai

musafiran-e-rah-e-shauq thak gae bhi to kya
jahan ruke wahin basti nai basa li hai