na chhod zid magar is ko ana ka nam na de
ye ek but hai tu but ko khuda ka nam na de

gila nahin mujhe teri munafiqat ka magar
munafiqat ko khulus-e-wafa ka nam na de

qubul tark-e-talluq bhi hai hamein lekin
tu is sitam ko hamari raza ka nam na de

ek aarzu hai talluq bahaal karne ki
is aarzu ko meri iltija ka nam na de

jo tere zulm-o-sitam par khamosh hai 'anwar'
to apne zulm-o-sitam ko saza ka nam na de