na dil dimagh ka is mein qusur hota hai
kisi se ek nazar ka fitur hota hai

riwayaten bhi ajab hain badi mohabbat ki
jo dil ke pas ho aankhon se dur hota hai

koi bhi shakl yun hoti nahin hai nurani
tape jo aag mein us par bhi nur hota hai

kuchh ek chiz kahin aa to jae hain lekin
ruke wahi hain jahan par shuur hota hai

ye rab hi jaane ki wo ishq kis ko kis se kab
par ek bar to sab ko zarur hota hai

kuchh ek ghunt laga raat milne jaunga
suna hai shab ko nashe mein wo chur hota hai

usul-e-ishq ki takrar ka hai jis ko bhi
ziyaada pyar usi ka qusur hota hai