na dil mein sabr na ab dida-e-pur-ab mein khwab
shitab aa ki hamein aawe is azab mein khwab

jahan bhi khwab hai aur hum bhi khwab hain ai dil
ajab bahaar ka dekha ye hum ne khwab mein khwab

hamari chashm ka ai shahsawar tausan-e-naz
jo ghaur ki to kiya hai teri rikab mein khwab

har ek makan mein guzargah-e-khwab hai lekin
agar nahin to nahin ishq ke janab mein khwab

hujum-e-ashk mein lagti hai chashm-e-tar is taur
ki jaise mahi ko aata hai apne aab mein khwab

rawa-rawi mein lage aankh kis tarah se 'nazir'
musafiron ko kahan aise iztirab mein khwab