na gul na sarw miyan-e-bahaar hota hai
hamari khak se paida chinar hota hai

kabhi jo jalwa-e-rukhsar-e-yar hota hai
charagh-e-tur charagh-e-mazar hota hai

utha janaza jo mera qaza lagi kahne
ki jo piyaada hai aakhir sawar hota hai

mila ke khak mein tan ko gai bahisht mein ruh
kisi ka kaun zamane mein yar hota hai

baja hai takht-e-sulaiman pe bhi jo mari lat
har ek murgh yahan tajdar hota hai

na apne ghar mein mujhe ghair se mila ai hur
bahisht mein ye azab-e-fishaar hota hai

uruj 'arsh' jo manzur hai jala dil ko
ki aag lagti hai jab sard anar hota hai