na kuchh sawal kiya aur na kuchh gila mujh se
ajib shakhs tha mil kar bichhad gaya mujh se

tu apni zat mein ek manzil-e-wafa hai magar
main wo charagh ki raushan hai rasta mujh se

kisi ne chhin li binai meri aankhon ki
kisi ne aaina mansub kar diya mujh se

maza to jab hai teri justuju mein jaan-e-bahaar
mere wajud ka ho jae samna mujh se

bujha diya to andheron ne aa ke gher liya
jala diya to ulajhne lagi hawa mujh se

wo sab se chhup ke mere ghar to aa gaya lekin
supurdagi ka taqaza na kar saka mujh se

jawab kuchh bhi diya jae gham nahin 'manzar'
sawal ye hai ki puchhega kya khuda mujh se