na-mukammal hain abhi takmila-e-zat karen
in ko dekhen to khud apne se mulaqat karen

aap aaen to zara aap se kuchh baat karen
hont si len magar aankhon se sawalat karen

gardishon se ye kaho rukh na karen ghar ki taraf
ab wo hum se sar-e-mai-khana mulaqat karen

aap ke bare mein socha to bahut tha lekin
ab hum is soch mein hain aap se kya baat karen

rukh pe kya rang hai kaisi hai in aankhon ki faza
dil jo thahre to kuchh andaza-e-haalat karen

ghar ki tanhai se kyon itne pareshan ho 'ziya'
aao ek but ke hawale se basar raat karen