na sah saka jab masafaton ke azab sare
to kar gae kuch meri aankhon se khwab sare

bayaz-e-dil par ghazal ki surat raqam kiye hain
tere karam bhi tere sitam bhi hisab sare

bahaar aai hai tum bhi aao idhar se guzro
ki dekhna chahte hain tum ko gulab sare

ye saneha hai ki waizon se ulajh pade hum
ye waqia hai ki pi rahe the sharab sare

bhala hua hum gunahgaron ne zid nahin ki
samet kar le gaya hai naseh sawab sare

'faraaz' kis ne mere muqaddar mein likh diye hain
bas ek dariya ki dosti mein sarab sare