na sitara na hi hum shams-o-qamar chahte hain
hum darakhton se faqat shakh-o-samar chahte hain

na zamin chahte hain aur na zar chahte hain
hum faqiran-e-khuda ek hi dar chahte hain

dasht-o-dariya ke amin bhi to hain aawara nasib
saeban koi bhi ho apna hi ghar chahte hain

muntaqil apni nadamat na karo ghairon tak
tajraba hum bhi kahan bar-e-digar chahte hain

shisha-o-chob ke danon se na bahlenge kabhi
daur-e-hazir ke ye bachche to guhar chahte hain

mansab-o-jah haqiqat mein hain mohtaji-e-dil
sochiye khub ye kya ilm-o-hunar chahte hain

bin bulae hi musafir ye chale aae the
waswase aap se ab izn-e-safar chahte hain

tum to akhbar sunate ho jahan ke 'rahi'
hum ki darwesh hain baatin ki khabar chahte hain