na-tawani ke sabab yan kis se uttha jae hai
aah uthne ki kahen kya dam hi baitha jae hai

naza mein har-chand hum chahen hain do baaten karen
kya karen maqdur kab hai kis se bola jae hai

aamad o raft un ki yan saat-ba-saat hai wahi
kab tabibon ka hamare sar se balwa jae hai

ja-e-riqqat hai meri haalat to ab ai ham-nashin
panw kya sidhe karun main dam hi ulta jae hai

tegh-e-abru tir-e-mizhgan sab rakhe hain san par
in dinon us ki taraf kab hum se dekha jae hai

zakhm-e-dil se mujh ko ek aati hai bu-e-uns si
us ke kuche ki taraf shayad ye rasta jae hai

'mushafi' tu ishq ki wadi mein aakhir lut gaya
is bayaban mein koi nadan tanha jae hai