na the ranj-o-alam aah-o-fughan kal shab jahan main tha
bahaaren thin na tha khauf-e-khizan kal shab jahan mein tha

jahan-e-sabit-o-sayyar tha gard-e-safar meri
mere zer-e-qadam thi kahkashan kal shab jahan main tha

pari-paikar nigare sarw-qadde lala-rukhsare
hasin ek ek se badh kar the wahan kal shab jahan main tha

moaddab saf-ba-saf karrubiyan tazim dete the
sarir-ara the shah-e-do-jahan kal shab jahan main tha

ata-e-ahl-e-dil hai is ko ahl-e-dil samajhte the
main pahuncha kis tarah kaise wahan kal shab jahan main tha