na wo fariyaad ka matlab na mansha-e-fughan samjhe
hum aaj apni shab-e-gham ki ghalat-samaniyan samjhe

badi mushkil se un ka raaz-e-ulfat ho saka pinhan
badi muddat mein ja kar hum mizaj-e-raaz-dan samjhe

ab aaya hai to baithe chaara-gar khamosh baalin par
meri be-chainiyan dekhe meri be-tabiyan samjhe

payam-e-shadmani kya samajh kar de koi us ko
jo tere gham ko takmil-e-nishat-e-do-jahan samjhe

main is duniya mein ai 'simab' ek raaz-e-haqiqat tha
samajhne ki tarah ahl-e-jahan mujh ko kahan samjhe