na wo jazbaat ki lahren na ehsasat ka dariya
liye phirta hun aankhon mein ajab khadshat ka dariya

machalti shokh maujon ko main apne nam kyun likkhun
ki aakhir khushk hoga mausam-e-barsat ka dariya

kise malum ye kashti lage kis ghat par ja kar
baha le jae kya jaane kidhar haalat ka dariya

kahan is aankh ka jugnu ki chamke bhi to chhupne ko
kahan hum bekason ki baatini zulmat ka dariya

hawaen chup khala viran faza ghamgin safar mushkil
rawan hadd-e-nazar tak jabr ke lamhat ka dariya

zaban ki khamushi taqrir ko dafna nahin sakti
nahin rukta 'figar' alfaz-o-takhliqat ka dariya