nahin do qubba-e-pistan shokh-o-shang sine par
nazar aate hain mina-e-mai-e-gul-rang sine par

nahin rakhe hain tu ne har tarah ke phul angiya mein
jawahar ye nazar aate hain ranga-rang sine par

nahin lauh-e-mazar-e-raftgan-e-shahr-e-khamoshan
gham-e-furqat ka rakh kar so rahe hain sang sine par

numud jism ka us sim-tan ko hai khayal itna
ki khush rahta hai khayyaton se kapde tang sine par

khuda ke fazl se shauq-e-lughat hai 'mehr' ko itna
dhare rahte hain pahron nuskha-e-farsang sine par