nai ghazlen likhun kis ke liye aur git sajaun kis ke liye
mera ham-dam mujh se ruth gaya ab naghme gaun kis ke liye

wo pas jo tha to us ke liye auron se bhi ladna padta tha
ab kis ke liye main kis se ladun aur khud ko jalaun kis ke liye

ek us ke tabassum ki khatir dukh-dard hazaron sahta tha
ab kis ke liye dukh-dard sahun aur ashk bahaun kis ke liye

wo tha to faqat us ki khatir auron se bhi milna padta tha
ab aise waise logon ke main naz uthaun kis ke liye

main us ke liye hi sanwarta tha aur khud ko sajaya karta tha
ab khud ko sanwarun kis ke liye aur ghar ko sajaun kis ke liye

jab des mein koi apna tha pardes mein kab ji lagta tha
ab kis ke liye ghar yaad aae aur des ko jaun kis ke liye

us ka nahin 'arif' koi badal aisa hai wo mera jaan-e-ghazal
ab us ke siwa kya yaad rakhun aur us ko bhulaun kis ke liye