nala rukta hai to sar-garm-e-jafa hota hai
dard thamta hai to be-dard khafa hota hai

phir nazar jhenpti hai aankh jhuki jati hai
dekhiye dekhiye phir tir khata hota hai

ishq mein hasrat-e-dil ka to nikalna kaisa
dam nikalne mein bhi kam-bakht maza hota hai

haal-e-dil un se na kahta tha hamin chuk gae
ab koi baat banaen bhi to kya hota hai

aah mein kuchh bhi asar ho to sharar-bar kahun
warna shoala bhi haqiqat mein hawa hota hai

hijr mein nala-o-fariyaad se baz aa 'ruswa'
aisi baaton se wo bedard khafa hota hai