nam hi rah gaya ek anjuman-arai ka
chhup gaya chand bhi ab to shab-e-tanhai ka

dil se jati nahin thahre hue qadmon ki sada
aankh ne swang racha rakkha hai binai ka

ek ek yaad ko aahon se jalata jaun
kaam saunpa hai ajab us ne masihai ka

ab na wo lams nigahon ka na khushbu ki sada
dil ne dekha tha magar khwab shanasai ka

saat-e-dard farozan hai baha len aansu
tutne ko hai kada waqt shakebai ka