namus-e-wafa ka pas raha shikwa bhi zaban tak la na sake
andar se to roe tut ke hum par ek bhi ashk baha na sake

sahil to nazar aaya lekin tufan mein bala ki shiddat thi
maujon ko manaya lakh magar hum jaanib sahil aa na sake

hum kahte kahte haar gae aur duniya ne kuchh bhi na suna
jab duniya ne israr kiya hum apna dard suna na sake

kab hum ne gulistan chaha tha kab hum ne bahaaren mangin thin
ek gul ki tamanna thi hum ko wo bhi to chaman mein pa na sake