naqsh-e-qadam hua hun mohabbat ki rah ka
kya dil-kusha makan hai meri sajda-gah ka

garmi sin aaftab-e-qayamat ki kyun darun
saya hai mujh kun sarw-e-qayamat-panah ka

nasur ho ki roz-e-qayamat talak bahe
jis ke jigar mein tir lage tujh nigah ka

piw ka jamal dekh hua chaak chaak dil
jiyun ki katan pe aks pade nur-e-mah ka

dore nahin hain surkh teri chashm-e-mast mein
shayad chadha hai khun kisi be-gunah ka

dil tujh birah ki aag sin kyunkar nikal sake
shoala sen kya chalega kaho barg kah ka

sumbul hai jiyun ki jalwa-numa juebar par
aankhon mein meri aks do-zulf-e-siyah ka

mahtab-ru ke rukh pe siyah khat nahin 'siraj'
ja kar khala hua hai mere dud aah ka