naqus ki sadaon se aur na azan se
nafrat hai us ko mulk ke amn-o-aman se

millat-farosh ko kisi millat se kya gharaz
us ko to hai gharaz faqat apni dukan se

chhalni jo kar gaya tha ayodhya ko ram ki
nikla tha tir wo bhi usi ki kaman se

apna bana ke aap ne ye kya ghazab kiya
begana kar diya mujhe sare jahan se

dil ko unhin se rah bhi hoti hai kuchh 'atiq'
alfaz jo nikalte hain dil ki zaban se