narawa sabt kiya kun ka ishaara kar ke
dekhna hai ye tamasha bhi dobara kar ke

haq-pasandi ne kahan chain dilon ko bakhsha
log ummid pe aae the sahaara kar ke

maslahat pa ke muarrikh ne kiya dafn use
log khush the unhin yaadon pe guzara kar ke

chand tajir hain kuchh aashiq hain aur ek do shair
dil ke bazar mein baithe hain khasara kar ke

ek laqab de ke use nam-o-nishan chhin liya
ishq ka qais ne ye naqsh ubhaara kar ke

kab likhe se hi hua koi kisi ka 'amir'
aap khud ke bhi hue khud ko gawara kar ke