nasheb-e-wahm faraaz-e-gurez-pa ke liye
hisar-e-khak hai had par har intiha ke liye

wufur-e-nashsha se rangat siyah si hai meri
jala hun main bhi ajab chashm-e-surma-sa ke liye

hai ird-gird ghana ban hare darakhton ka
khula hai dar kisi diwar mein hawa ke liye

zamin hai maskan-e-shar aasman sarab-alud
hai sara ahd saza mein kisi khata ke liye

asiri-e-pas-e-aina-e-baqa aur tu
nikal ke aa bhi wahan se kabhi khuda ke liye

khada hun zer-e-falak gumbad-e-sada mein 'munir'
ki jaise hath utha ho koi dua ke liye