naujawan log pajame ko bura kahte hain
paint phat jae to qismat ka likha kahte hain

apne ashaar mein juma ko juma kahte hain
aise ustad ko fakhrushshuara kahte hain

nazm ko gift rubai ko ata kahte hain
sher wo khud nahin kahte hain chacha kahte hain

i-m-f ko samajhte hain maishat ka ilaj
log al-kuhl ko khansi ki dawa kahte hain

ye to chalti nahin p-m ki ijazat ke baghair
is ko aiwan-e-sadarat ki hawa kahte hain

jaane kab is mein hamein aag lagani pad jae
hum siyasat ke janaze ko chita kahte hain

jab se bachchon ko pasand aai hain hindi filmen
mujh ko abba nahin kahte wo pita kahte hain

meri bari pe hukumat hi badal jati hai
ab wazarat ko ghubare ki hawa kahte hain

load-shedding ki shikayat pe dolatti mare
log bijli ke minister ko gadha kahte hain

bhuk takhliq ka talent badha deti hai
pet khali ho to hum sher naya kahte hain