nawah-e-wusat-e-maidan mein hairani bahut hai
dilon mein is kharabi se pareshani bahut hai

kahan se hai kahan tak hai khabar is ki nahin milti
ye duniya apne phailaw mein an-jaani bahut hai

badi mushkil se ye jaana ki hijr-e-yar mein rahna
bahut mushkil hai par aakhir mein aasani bahut hai

basar jitni hui bekar o be-manzil zamane mein
mujhe is zindagani par pashemani bahut hai

nikal aate hain raste khud-ba-khud jab kuchh na hota ho
ki mushkil mein hamein khwabon ki arzani bahut hai

bahut raunaq hai bazaron mein galiyon aur mohallon mein
par is raunaq se shahr-e-dil mein virani bahut hai