nazar aata nahin kuchh subh ke aasar ka rang
zulmat-e-gor se bad-tar hai shab-e-tar ka rang

ud gaya zoaf-e-maraz se rukh-e-bimar ka rang
de do thoda sa tum apne gul-e-rukhsar ka rang

hashr mein rahmat-e-dawar ne jo nazren dalin
ho gaya surkh wahin ru-e-gunahgar ka rang

fasl-e-mai aane do phir hai ye hamara zimma
ho gulabi na agar shaikh ki dastar ka rang

halqe aankhon mein pade murdani munh par chhae
nazar aata nahin achchha tere bimar ka rang

tum dikha do jo zara aariz-e-gulgun ki bahaar
to badal jae abhi chehra-e-bimar ka rang

araq-e-sharm-e-gunah ashk-e-nadamat se 'shahir'
saf ho jata hai sab ru-e-siyahkar ka rang