nazar koi nahin aata hai mehrban mujh ko
dayar-e-ghair sa lagta hai gulsitan mujh ko

mujhe to karni hai tamir-e-gulsitan phir se
agar sukun se rahne de aasman mujh ko

hazar bar zamane ne karwaten badlin
mita saki na kabhi gardish-e-jahan mujh ko

ajib baat hai jo ham-safar hain sadiyon se
samajh rahe hain wahi gard-e-karwan mujh ko

yahan na dost kisi ka na koi dushman hai
bura ho yas ka le aai hai kahan mujh ko

chhupae dost mera aastin mein khanjar tha
na ho saka kisi surat bhi ye guman mujh ko

jo mere dard ka darman 'nazir' batlata
milega ab wo masiha-nafas kahan mujh ko