nazar mein jazb shama-e-rukh ka jalwa kar liya main ne
dil-e-tarik mein aakhir ujala kar liya main ne

wo yaad aae to ek goshe mein chupke chupke ro ro kar
dil-e-ranjur ka kuchh bar halka kar liya main ne

kabhi jo but-parasti ke maze lene ko ji chaha
tasawwur us but-e-kafir-ada ka kar liya main ne

jo dil chaha to mastana-khirami ke tasawwur se
jahan-e-arzu mein hashr barpa kar liya main ne

kisi ke aariz-e-nurin ke jalwe yaad kar kar ke
shab-e-gham mein andhere ka sahaara kar liya main ne

haden mit jaen taki imtiyaz-e-kufr-o-iman ki
jamal-e-yar ko danista sajda kar liya main ne

mujhe kya fikr ab ranj-e-judai ki 'anis' aakhir
jamal-e-ham-nashin ko dil mein paida kar liya main ne