nazar mein kuchh na thi pahle kabhi tauqir mitti ki
farishte dang hain ab dekh ke taqdir mitti ki

hazaron neamaten deti hain lekin zarb sah sah kar
khuda ne bhi banai hai ajab taqdir mitti ki

sunai degi zalim tujh ko tab majbur ki aahen
jakad legi tere pairon ko jab zanjir mitti ki

ki jaise ped ki har shakh mujh se baat karti hai
ki jaise dekhta rahta hun main tasir mitti ki

imarat koh-o-sahra ped dariya aadmi sare
zamin par basne wale hain magar jagir mitti ki

teri puja karenge log ek din dekhna 'atish'
bana kar us ne rakkhi hai teri taswir mitti ki