nazar mein shaiba-e-husn-e-yar aa jae
jidhar nigah utha dun bahaar aa jae

batate hain tere kuche mein meri khair ahbab
meri taraf se na dil mein ghubar aa jae

meri lahad pe raqibon ne sang-e-rah likha
tumhaare dil mein na koi ghubar aa jae

musir hain is pe wafaen meri ki ab turbat
bagula ban ke sar-e-rah-e-yar aa jae

dikha na saqi-e-roz-e-azal mujhe ek din
kahin na zindagi bhar ko khumar aa jae

jagane qabr pe gar roz-e-hashr wo aaen
to lutf-e-gardish-e-lail-o-nahaar aa jae

ilahi hans pade dozakh bhi teri rahmat par
sametun aag to bagh-o-bahaar aa jae

talab to ho dil-e-ashiq se kya nahin mumkin
ye gar ba-zid ho to parwardigar aa jae

wahin talash karo jalwa-gah-e-naz 'qadir'
nazar jahan wo dil-e-dagh-dar aa jae