nazar-nawaz nazar ka ye zawiya kyon hai
numud-e-aks pe hairan aaina kyon hai

zaban pe harf-e-anal-haq laraz raha hai kyon
junun-e-ishq tazabzub ka marhala kyon hai

wahi hai manzil-e-akhir jahan safar aaghaz
bandha hua mere qadmon se daera kyon hai

hayat-o-maut ka maqsad agar nahin malum
shikast-o-rekht ka be-kar silsila kyon hai

ye kis ne zahr milaya hai jam-e-hasti mein
ab aisa talkh tanaffus ka zaiqa kyon hai

nizam aap ka tanzim aap ki jaanan
to ab tamasha-e-taftish-e-hadisa kyon hai

yahan to jine ko darkar hausla hai bahut
dil-e-tabah mein baqi ye hausla kyon hai

qadam qadam na hon sayyaad ki bichhi aankhen
saja saja meri manzil ka rasta kyon hai

faza-e-sher-o-sukhan be-aman hui 'pinhan'
dayar-e-zagh-o-zaghan mein ye fakhta kyon hai