nazish-e-husn-e-nazar hain hum log
azmat-e-sham-o-sahar hain hum log

husn-e-do-roza pe nazan kyon ho
daimi kohl-e-basar hain hum log

karwan rahguzar aur rahbar
aur phir gard-e-safar hain hum log

har qadam husn ke mahshar lekin
hashr ki had-e-nazar hain hum log

kyon zamana nahin waqif hum se
haibat-o-khauf-o-khatar hain hum log

waqt hai tez rawan hum khufta
kitne kotah-nazar hain hum log