naznin jin ke kuchh niyaz nahin
in hasinon se dil ko saz nahin

ghair ka bhed kyun na khul jae
aap ke dil ka to wo raaz nahin

ek teri zat ke siwa zahid
koi duniya mein pak-baz nahin

is mein pata hun kuchh teri khubi
mujh ko be-wajh dil pe naz nahin

jitne hain ahl-e-dard hain hamdard
dil wo patthar hai jo gudaz nahin

kah rahi hai ye sadgi ki ada
nek-o-bad mein kuchh imtiyaz nahin

jubba-sai buton ke dar ki 'hafiz'
zahid-e-khushk ki namaz nahin