nigah-e-lutf mat uth khugar-e-alam rahne de
hamein nakaam rahna hai hamein nakaam rahne de

kisi masum par be-dad ka ilzam kya mani
ye wahshat-khez baaten ishq-e-bad-anjam rahne de

abhi rahne de dil mein shauq-e-shorida ke hangame
abhi sar mein mohabbat ka junun-e-kham rahne de

abhi rahne de kuchh din lutf-e-naghma masti-e-sahba
abhi ye saz rahne de abhi ye jam rahne de

kahan tak husn bhi aakhir kare pas-e-rawa-dari
agar ye ishq khud hi farq-e-khas-o-am rahne de

ba-in rindi 'majaz' ek shaer-e-mazdur-o-dahqan hai
agar shahron mein wo bad-nam hai bad-nam rahne de