chhedte hain gudgudate hain phir arman aaj-kal
jhute sachche koi kar le ahd-o-paiman aaj-kal

ghont de mera gala kuchh zor agar us ka chale
hath se mere hi tang itna gareban aaj-kal

chadh gae diwar-e-zindan par kabhi utre kabhi
hum bane hain saya-e-diwar-e-zindan aaj-kal

roz raaton ko suna karta hun ye aawaz-e-qais
phade khata hai mujhe khali bayaban aaj-kal

ai urus-e-tegh kuchh tujh ko haya bhi chahiye
kyun gale padti hai tu ho ho ke uryan aaj-kal

sang-dil kafir ka shayad tutte dekha hai kufr
tut kar milte hain mujh se is ke darban aaj-kal

aa gaya aisa hi ab kafir zamana kya karen
dabe phirte hain baghal mein log iman aaj-kal

raat-din hai meri turbat par hasinon ka hujum
dekhne ki chiz hai gor-e-ghariban aaj-kal

din ko roza id shab ko hai ajab shaghl-e-'riyaz'
raat-bhar pita hai ye mard-e-musalman aaj-kal